فانديتــا … انت مختفي ليــه الفترة اللي فاتت؟
ناس كتير بتفكر ان الموضوع كان كسل مني او بايدي، بس فترة كورونا ماكنتش عامل حسابى احضر شغل كفاية و وقتها الاستوديوهات قفلت وكان صعب اخد اى اجراء وقتها، و ماكنش فى ايدي حاجة غير اني استني
ولقيت انها فرصة اتعلم اكتر عشان الموضوع يكون احترافي اكتر.
طيب مبدئياً كده ازيــك ؟
كله زي الفل
قولي اسم فانديتــا جه ازاي ؟
ده كان بسبب اني بحب الفيلم جدا و صحابي هما اللى سموني كده
بدايتك في الباتل راب والراب مختلفين عن بعض اكيــد, بدايتك جــت امتي و ازاي ؟
فى الباتلــز كان لورد وفرغلى عاملين فكرة البرنامج وقالولى عشان اكون مشارك فى اول ايڤينت فيها، وساعتها نزلت قدام انيس واكتشفت اني بعرف اباتل بالصدفة
فى الراب كنت اصلا بكتب وحبيت اجرب ولقيت ستوديو عامل عروض تسجيل كويس روحت جربت ومرة مع مرة بدأت اطور من نفسي
انت مختفي عن الباتلز بقالك فترة والجمهور نفسه يشوفك تاني ناوي ترجع تباتل قريب ؟
اكيد ، دي حاجة صعب ابطلها
شايف مين خصمك الجــاي ؟
واحد حظه وحش
ناوي تركز علي ايه الفترة الجاية ؟
الباتلز والتراكات مع بعض ، عايز اوصل لمكان محدش وصله فى مصر
في البومات ؟
محضر لحد الان البومين ، اول تراك فى اول البوم اسمه ادارة هينزل بعد كام يوم
كاريرك في الباتـل راب لو هتلخصه في كلميتن هيكونوا ايه ؟
الـلا هزيمة
فانديتا …. مين اقوي باتلر في مصر ؟
اى حد غيري لانى الاقوى فى الوطن العربي ، مش مصر بس
انت باتلــت في الاثنين فا هسالـك .. راب اور ضاي ولا الباتل زون ؟
اى مكان بكون فيه هو الافضل بدون شك, وانا موجود فى اى مكان فيه منافسة، بس ميمنعش ان يا تراب يا تموت هى البيت الاساسي برضه
اقوي خصم واجهته في باتل ؟
فرغلى بلاكس
تحب الناس تصنفـك كباتلـر ولا رابر ولا الاثنين ؟
كـباتلر و رابر و كـارتيست لاني هعمل حاجات كتير اول مرة تتعمل فى مصر الفترة الجاية ، افتكر اسم "up to way" وهتفهم بعدين
ولي ايه هي اقوي باتل شوفتها مكنتش خصم فيها ؟
باتل امام وكيال
كلمنا شوية عن خططك الفترة الجاية .. ناوي تعمل ايه ؟
هعمل كل حاجة فى وسعي عشان السنة دي لازم تبقي عيد فى تاريخي، أنا محضر حاجات كتير جدا ومتفائل جدا بالناس اللى بتقف ورا الجامد والمجتهد مش اللى معاه علاقات، كلها كام يوم وهنبدأ
من وجهة نظرك شايف ايه اكتر الحاجات اللي ظلمت مجال الباتل راب في مصر ؟
ان فيه ناس كتير من الباتلرز الجُداد بيقلدو مش عاملين شخصية لـنفسهم، وطبعا فيه ناس مميزة جدا
ويمكن عشان الثقافة دي مش منتشرة فى مصر بس كله جي وكله بتاعنا
لو بايدك تغير حاجة واحــدة بس والحاجة دي كانت هتفرق بشكل ايجابي مع الجيل بتاعكم في راب اور ضاي هتكون ايه الحاجة ؟
ان اللى حصل زمان وبدايتنا كانت تبقي دلوقتي لما الناس كلها عرفت يعني ايه راب
لو رجعت بالزمن للوقت اللي كنت فيه لسـه بتبدأ بس بخبرة دلوقتي كان هيفرق معاك ازاي وفي ايه ؟
كان زمان ارقامي على يوتيوب اكبر من عدد ارقام موبايلك
كان هيفرق فى الفرص اللى ضاعت اللى كانت محتاجة خبرة، بس ملحـوقة ، الخبرة موجودة وانا موجود و معنديش حاجة فى حياتي غير اني اكون او لا اكون
شايف عندك ايه مختلف تقدمـه الفترة الجاية
مخ ، باتلز ، تراكات ، انا هنقل الراب المصري فى مكان تاني
هيكون في فيتشرز في شغلك الفترة الجاية ولا هتركز انت تشتغل لوحدك اكتر ؟
الاتنين ، فيه شغل لوحدى كتير وفيه فيتشرز مع ناس بتحبوهم
هتباتـل فرغلي تاني ؟
معنديش اجابة بصراحة
انت عملت كام باتل لحد دلوقتي
8 … والتاسعة قربت
اول حاجة هتنزل الفترة الجاية قربت ولا لسه ؟
اول حاجة تراك انا غنيته في راب شارع و هينزل فى خلال كام يوم